Пу чарадығны правительство оргкомитедінің араласчылары ӧнетін чыылығ соонаң алғаннар. Соох кӱннер табырах чылып парғаннаңар, наңмыр чаап парған сылтаанда, республика ипподромының чирі кӧп чон пайрамнирына чарабас пол парған.
-
Аал хонии рыногы – пу киректерде пайрам иртірерге иң чахсы орын пол парды. Пу чирде хорғыс тың чох полар паза право хайраллирына килісче. Сынап таа, пістің чуртағҷыларның пу орынға хомзыныстарын пілчебіс, че, хомзынысха чоохтирға кирек, тигір канцеляриязына чахығ пирбессің. Чыл пазы улуғ худай киреен апарча, иң ӧӧні – пістің чирібістің прай чуртағҷыларын піріктірче. Пайрам чахсы иртерге прай кӱзібісті саларбыс, — теен Хакасияның культура министрі Светлана Окольникова.
-
Чыл пазы хакастарның чон календарында иң улуғ пайрамнарның санына кірче, чир-чайаанның усхунғанын паза Чайааннарның чирзер айланғанын таныхтапча. Пайрамның кӱнін алыстырардаңар сағынғабыс, че ол орта полбасчых – пістің ӧбекелерібістің чахығларына улуғ хайығ саларға кирек, олар пу пайрамны часхы тиң кӱн тузына орта таныхтаҷаңнар. Аннаң даа пасха, пу чылда пайрам Чир-суғ арачылағҷызының чылына, Улуғ Чиңістің 80 чылына паза Хакасияның матырларының чылына чарыдылча. Ол позында улуғ нимені тутча – СВО иртірчеткен чирде Чир-суубысты арачылапчатхан матыр чааҷыларыбысха худай полызии осхас. Пу кирек пайрамны ырах тусха кӧзірері орта нимес поларҷых. Устағҷыларға паза прай кізілерге, амды Чыл пазы иртерге кӱстенчеткеннерге, алғызымны читірерге сағынчам, — таныхтаан Хакасияның Ӧӧркі Чӧбінің пастағы орынҷызы, хакас чонның Республика Ах сағаллар чӧбінің устағҷызы Петр Воронин.
👉 Іди, «Чыл пазы. Чиңіске чол» пайрам Республика аал хонии рыногында (Ағбан город, Тельман орамазы, 92 «К») иртер. Программа алыспинча.
Анынаң Хакасияның минкультуразының сайтында танызарға чарир пу ссылка хоостыра: clck.ru/3HoVZB
