Ӱртӱн айының 20-ҷі кӱнінде 14:30 часта Л. Р. Кызласов адынаң Хакас национальнай краеведение музейінде «Хаҷан даа хадағда!» теен темаа чарыдылған ӧнетін сомнар кӧзідии тоғынып пастир.
Ол Россия Федерациязының национальнай гвардия войсколарының Федеральнай службазы тӧстелгеннең пеер тоғызынҷы чылына чарыдылча. Сомнар кӧзідии стендтерінде Хакас Республиказындағы Росгвардия Управлениезінің чааҷыларының паза тоғынҷыларының служебно-боевой тоғызынаңар 150-дең артых сом чарыхха сығарылар.
Сомнарда ведомстволар тастындағы хадарығның тудығ группаларының, лицензия-чарадығ тоғызының, чаа тиріглерінің чарабас садығлас киреен кӧрчеткеннердеңер, ОМОН паза СОБР спецподразделениелерінің тоғызы кӧзіділче. Олар чирдең, суғдаң паза тигірдең палғалыстығ чааҷылар пӧгіннерін толдырчалар. Хай пірее сомнар росгвардеецтернің чиит улусты чаа-патриот хылиина ӱгредеріне паза социальнай акцияларында араласчатханнарын чоохтапчалар.
Сомнар кӧзідиинде архивтегі сомнарға уғаа улуғ хайығ салылча. Олар іскеркі киректер чон комиссариадының войсколары Илбек Ада чаадағы харбастарында араласханнарын кӧзітчелер.
Ідӧк анда пасха-пасха чылларда Совет Союзының Матыры паза Россияның Матыры ӧӧн аттарға турысхан право арачылаҷаң войсколарның кізілері кӧзіділче. Оларның санында тӧреен чирібісті арачылирынҷа ӧнетін тирігліг хайыныс араласчылары даа пар. Матырларның сомнарынаң хада кӧрігҷілер оларның чуртастарынаңар паза матыр киректерінеңер танызып аларлар.
Кӧзідіг азылчатхан кӱнде право арачылаҷаң войсколарның амғы тус кип-азахтары паза специальнай техника тирiглерi – кізі чох учуғыстығ аппараттар кӧзідiлер.
«Хаҷан даа хадарығда!» теен сомнар кӧзідии музейде ӱртӱн айының 31-ҷі кӱніне читіре тоғынар.
Частар категориязы: 0+.
Кӧзідіге кірері тик.
