Сӧстері Моисей Баиновти, кӧӧ Сибдей Томни
***
Чаным чалбыраан хыс кӧрзем,
Чайаан салғаны тіҷеңмiн.
Чаным сарынын чаап салзам,
Час палығ халҷаң чанымда.
Кӧксімні ӧртеен хыс кӧрзем,
Худай салғаны тіҷеңмін.
Кӧңнім сарынын кӧӧм салзам,
Ханнығ іс халҷаң істімде.
***
Ӱзӱріп салған одыңны
Ӱбӱртеечетсең тамылбас.
Ӱзӱліп парған хонығың
Уластырзаң даа пірікпес.
Чабыра пасхан одыңны
Чарчых таа салзаң тамылбас.
Частығып парған часкаңны
Чапсыр таа чōрзең чапсынмас.
***
Адам чулазы ах ызых
Арғамҷы кӧрбин ойлазын.
Аарлазып ӧскен ас чоным
Аарда хызылбин чуртазын.
Іҷем чулазы кӧк ызых
Кӧлігні кӧрбин ойлазын.
Кӧӧленген минің пар чоным
Кӧрерге сіліг чуртазын.
